Бангкокта өтіп жатқан World Boxing ұйымының 22 жасқа дейінгі Азия чемпионатында қазақстандық боксшы Бақыт Сейдіш тарихи жеңіске жетті.
Бақыт Сейдіш 70 келіге дейінгі салмақ дәрежесінде өзбекстандық Ойша Тоировамен алтын үшін айқасқа шықты.
Бірінші раундта Тоирова төрешілер шешімімен 3:2 есебінде алға шықты. Келесі раундта Сейдіш қарқынын күшейтіп, айқын басымдықпен 5:0 есебін тіркеді.Шешуші сәтте Бақыт толық үстемдік орнатып, соңғы есепті 5:0-мен түйіндеді.
Осылайша Бақыт Сейдіш – 22 жасқа дейінгі Азия чемпионы, ал Ойша Тоирова күміс жүлдегер атанды.
Бақыт Сейдіш биыл мамырда Шри-Ланканың Коломбо қаласында өткен жастар арасындағы Азия чемпионатында да жеңімпаз атанған. Бұл жарыс ASBC және IBA аясында өтті. Ал Қазақстан жалпыкомандалық есепте 41 алтын медаль иеленіп, құрлықтық турнирде үстемдігін дәлелдеді.
