Қазақстандық аралас жекпе-жек шебері Жалғас Жұмағұлов (18-9) өзінің келесі айқасының уақытын және қарсыласын ресми түрде хабарлады.
Жекпе-жек 28 желтоқсан күні Прага қаласында өтеді. Жұмағұловтың қарсыласы – жергілікті жанкүйерлердің сүйікті спортшысы, чехиялық Давид Дворжак (22-6).
«Аз-аздан дайындыққа кірісіп жатырмыз. Келісімшарт әлі толық бекітілмегенімен күн мен қарсылас белгілі. Алдымен Ақтөбеде алғашқы дайындық өткіземін. Кейін алдын ала лагерь үшін АҚШ-қа барамын. Содан соң Америкадан тікелей жекпе-жекке жолға шығамын, иншаАлла», – деді Жұмағұлов.
37 жастағы Жұмағұлов қазіргі уақытта Oktagon MMA лигасының ең жеңіл салмақтағы чемпионы. Бұл айқас оның тұңғыш титул қорғауы болмақ.
Давид Дворжак соңғы жекпе-жегінде неміс спортшысы Мохаммед Валидті (8-5) жеңіп, чемпиондық белбеуге үміткер атанды.
