Қазақстан құрамасының тағы бір боксшысы Азия чемпионатының финалына шықты (ВИДЕО)
Ташкентте жасөспірімдер арасындағы Азия чемпионатында U17 санатында бақ сынап жатқан Аяулым Оспанова 66 келіге дейінгі салмақта үздік нәтиже көрсетті.
Үндістандық қарсыласын айқын басымдықпен жеңді
Аяулым Оспанова Азия біріншілігінің жартылай финалында Харнур Каурмен жұдырықтасты. Жекпе-жек барысында қазақстандық боксшы қарсыласына мүмкіндік бермей, айқын басымдық танытты. Нәтижесінде төрешілердің бірауыздан шешімімен жеңіске жетті — 5:0.
Оспанова бұл жеңістен кейін Азия чемпионатының финалына шықты. Енді жарыстың алтын жүлдесі үшін рингке көтеріледі.
Ташкенттегі додаға 460-тан астам боксшы қатысып жатыр
Айта кетейік, U15 және U17 жас санаттары арасындағы Азия чемпионаты Өзбекстан астанасы Ташкент қаласында өтіп жатыр. Турнир Asian Boxing ұйымының қолдауымен ұйымдастырылған. Бұл ұйым — World Boxing құрылымының Азиядағы бөлімшесі.
Биылғы құрлықтық біріншілік соңғы жылдардағы ең ауқымды жарыстардың бірі саналады. Турнирге Азияның 21 елінен 460-тан астам жас боксшы қатысуда.