WBC рейтингінің бірінші нөмірі Мейірім Нұрсұлтанов рингке оралады
Отандасымыз 2023 жылдан бері жекпе-жек өткізген жоқ.
Қазақстандық кәсіпқой боксшы, орта салмақтағы WBC рейтингінің бірінші нөмірі Мейірім Нұрсұлтанов жақын уақытта рингке оралады.
Қазіргі таңда қазақстандық спортшы АҚШ-та жаттығу өткізіп жатыр. Оның алдағы жекпе-жегіне қатысты алғашқы ақпаратты мансабын аяқтаған қазақстандық боксшы Мадияр Әшкеев әлеуметтік желідегі парақшасында жариялады.
Әшкеев: "Жақында үлкен жаңалық болады"
Мадияр Әшкеев Instagram парақшасында Мейірім Нұрсұлтановтың жаттығуынан видео бөлісіп, қазақстандық боксшының рингке шығатынын меңзеді.
"Жақында үлкен жаңалық болады! Біздің чемпион Мейірім Нұрсұлтанов бокс рингіне шығады. Бокс әлемінде жаңа есімнің пайда болуына аз уақыт қалды", — деп жазды Әшкеев.
Бұл жазбадан кейін Нұрсұлтановтың келесі жекпе-жегі туралы әңгіме қайта қыза түсті. Әзірге қарсыласы мен нақты күні ресми түрде жарияланған жоқ.
Нұрсұлтанов 2023 жылдан бері жекпе-жек өткізген жоқ
Мейірім Нұрсұлтанов соңғы рет рингке 2023 жылы шыққан. Содан бері ол ресми жекпе-жек өткізген жоқ.
Қазақстандық боксшының кәсіби рекорды — 20 жеңіс, 0 жеңіліс. Оның 11 жекпе-жегі нокаутпен аяқталған. Қазіргі таңда Нұрсұлтанов WBC нұсқасы бойынша орта салмақтағы рейтингтің бірінші сатысында тұр.
Алдын ала ақпаратқа сәйкес, Мейірім Нұрсұлтанов келесі жекпе-жегінде WBC нұсқасы бойынша орта салмақтағы "уақытша" әлем чемпионы атағы үшін жұдырықтасуы ықтимал.
Бұл дивизиондағы негізгі әлем чемпионы — Доминикан Республикасы өкілі Карлос Адамес. Егер Нұрсұлтанов уақытша титул үшін өтетін айқаста жеңіске жетсе, ол толыққанды чемпиондық белбеуге басты үміткерлердің біріне айналады.