Қазақстан U-23 Азия чемпионатында төрт алтын алса да, медаль есебінде бірінші орыннан айырылды
Вьетнамның Дананг қаласында 23 жасқа дейінгі балуандар арасындағы Азия чемпионатында еркін күрес шеберлерінің бәсекесі аяқталды.
Еркін күрестегі Қазақстан құрамасының нәтижесі
Бұл турнир еркін күрестен Қазақстан құрамасының бас бапкері Еркебұлан Кешубаев үшін жаңа қызметіндегі алғашқы ірі сынақ болды. Қазақстандық балуандардың нәтижесі төмендегідей:
57 кг. Еламан Амангелді — алтын медаль үшін белдесуде жеңілді.
61 кг. Нұрданат Айтанов — финалда жеңіске жетіп, Азия чемпионы атанды.
65 кг. Шаттық Алайдар — қола медаль үшін белдесуде жеңіске жетті.
70 кг. Майис Әлиев — алтын медаль үшін айқаста қарсыласынан басым түсті.
74 кг. Нұрдәулет Сейілбеков — финалда жеңіске жетіп, құрлық біріншілігінің чемпионы болды.
79 кг. Ерхан Әбіл — финалда жеңіліп, күміс медаль алды.
86 кг. Абылайхан Өзембаев — алтын жүлде үшін белдесуде қарсыласына есе жіберді.
92 кг. Бейбарыс Қасымбек — айналмалы жүйедегі үш белдесудің екеуінде жеңіліп, жартылай финалға өте алмады.
97 кг. Камиль Куруглиев — үш белдесудің екеуінде жеңіліс тауып, жартылай финалға шықпады.
125 кг. Ризабек Айтмұқан — финалда жеңіске жетіп, Азия чемпионы атанды.
Қазақстан неге бірінші орын алмады?
Қазақстан құрамасы еркін күресте 4 алтын, 3 күміс және 1 қола медаль жеңіп алды. Ал Үндістан құрамасы да төрт алтын мен үш күміс еншіледі, бірақ қола медаль саны бойынша алға шықты.
Осылайша, жалпы есепте Үндістан бірінші орынға көтерілді, ал Қазақстан екінші сатыға жайғасты.
U-23 Азия чемпионатының медаль кестесі
- Үндістан — 4 алтын, 3 күміс, 2 қола
- Қазақстан — 4 алтын, 3 күміс, 1 қола
- Қырғызстан — 1 алтын, 3 күміс, 5 қола
- Түрікменстан — 1 алтын, 0 күміс, 3 қола
- Өзбекстан — 0 алтын, 1 күміс, 2 қола
- Моңғолия — 0 алтын, 0 күміс, 2 қола
- Оңтүстік Корея — 0 алтын, 0 күміс, 2 қола
Айта кетейік, бұған дейінгі Азия чемпионатында қазақстандық еркін күрес шеберлерінің нәтижесі бұдан төмен болған. 2025 жылғы құрлық додасында Қазақстан құрамасы 1 алтын, 3 күміс және 3 қола медаль иеленді.
Еске салайық, U-23 Азия чемпионатында бұған дейін Қазақстан атынан грек-рим күресі шеберлері мен әйелдер құрамасы да кілемге шыққан.