Иван Дычко оралды. Англияда айқас өткізеді

Суперауыр салмақтағы қазақстандық боксшы Иван Дычко рингке қашан оралатыны белгілі болды. Отандасымыз 6 маусым күні Англияның Борнмут қаласында өтетін Zuffa Boxing 7 турнирінде өнер көрсетеді.

Дычконың қарсыласы кім?

Иван Дычко бұл жолы жергілікті боксшы Харви Дайкспен кездеседі. Британдық спортшының кәсіпқой рингтегі көрсеткіші — 7 жеңіс, 0 жеңіліс және 1 тең нәтиже. Айқас он раундқа жоспарланған. 

Иван Дычко соңғы жекпе-жегін өткен жылдың 13 қыркүйегінде Лас-Вегаста өткізді. Ол Сауль Альварес пен Теренс Кроуфорд арасындағы бокс кешінің андеркардында америкалық Джермейн Франклин-кішісімен жұдырықтасты.

Бұл кездесуде Дычко төрешілердің бірауыздан шешімімен жеңіліп қалды. Осылайша қазақстандық боксшы кәсіпқой мансабындағы алғашқы жеңілісіне ұшыраған еді.

Қазіргі таңда Дычконың рекорды — 15 жеңіс және 1 жеңіліс. Оның 14 жеңісі нокаутпен аяқталған.

Дайкс соңғы жекпе-жегінде жеңіске жетті

Харви Дайкс соңғы рет 21 қараша күні Англияның Брайтон қаласында рингке шықты. Ол Беларусь өкілі Виктор Чварковты ұпай санымен жеңді.