Қазақстан ба, Өзбекстан ба? Екі құраманың Азия чемпионаттарындағы деңгейі салыстырылды

5 шілдеде Джакартада бокстан U-19 және U-23 жас санаттары арасындағы Азия чемпионаты басталады. Әдеттегідей Азия боксының басты бәсекелестері — Қазақстан мен Өзбекстан. 

Бұдан бөлек, бұл турнир екі елдің ересектер құрамасына кімді дайындап жатқанын да көрсететіндей.

U-23 форматы қалай пайда болды?

Ұзақ уақыт бойы Азия бокс конфедерациясы жасөспірімдер мен жастар арасында чемпионат өткізіп келді. Ал 2022 жылдан бастап алғаш рет U-22 жас шектеуі енгізілді.

Кейін World Boxing құрылымына жақын Asian Boxing ұйымы салмақ және жас санаттарына өзгеріс енгізіп, бұл деңгейді U-23 форматына дейін кеңейтті. Осылайша 23 жасқа дейінгі боксшылар үшін құрлықтық біріншіліктің маңызы арта түсті.

2022 жыл: Өзбекстан өз алаңында үстем болды

U-22 форматындағы алғашқы Азия чемпионаты 2022 жылы Ташкентте өтті. Бастапқыда турнир басқа елде және басқа уақытта ұйымдастырылуы тиіс болған, бірақ кейін Өзбекстан астанасына ауыстырылды.

Қазақстан құрамасы осыған байланысты бұл жарысқа қатысқан жоқ. Ал өзбек боксшылары басты қарсыластарының жоқтығын тиімді пайдаланып, 13 салмақтың 12-сінде алтын медаль жеңіп алды.

2023 жыл: Бангкоктағы алғашқы текетірес

Қазақстан мен Өзбекстан U-22 Азия чемпионатында алғаш рет 2023 жылы Таиландтың Бангкок қаласында толық құраммен бетпе-бет келді.

Бұл турнирде Өзбекстан құрамасы айқын басымдық көрсетті. Олар тоғыз алтын медаль жеңіп алса, Қазақстан құрамасы үш алтынмен шектелді.

Финалдағы Қазақстан — Өзбекстан жекпе-жегінің үшеуінде көрші ел боксшылары жеңіске жетті. Қазақстан атынан жалғыз жеңісті Санжар Тәшкенбай тіркеп, Шодиёржон Меликузиевтен басым түсті. Ал Сабыржан Аққалықов алтын үшін айқаста Исломовқа есе жіберді.

2024 жыл: Қазақстан өз жерінде жауап қайтарды

2024 жылы Азия чемпионаты Қазақстанда жоғары деңгейде өтті. Турнир қорытындысы бойынша Қазақстан құрамасы жалпы есепте жеңімпаз атанды.

Ел боксшылары 8 алтын және 5 күміс медаль жеңіп алды. Өзбекстан құрамасының нәтижесі бұдан әлдеқайда төмен болды — 2 алтын, 3 күміс және 5 қола.

Қазақстан мен Өзбекстан арасындағы бес финалдық жекпе-жектің үшеуінде қазақстандықтар жеңді:

• Кенже Мұратұлы Асилбек Жалиловты жеңді;
• Ерасыл Таңқай Абдуллоҳ Мадаминовқа есе жіберді;
• Диас Молжігітов Жавохир Умматалиевтен басым түсті;
• Темірлан Мұқатаев Самандар Жалоловты нокаутқа түсірді;
• Аманат Сабырғали Жахонгир Зокировтан бірінші раундта жеңілді.

2025 жыл: Шри-Ланкадағы басымдық

2025 жылы жастар арасындағы Азия біріншіліктері екі түрлі ұйым аясында өтті. Алдымен ASBC өткізген чемпионат Шри-Ланкада ұйымдастырылды.

Бұл турнирге Өзбекстан құрамасы шектеулі құраммен барды. Соның нәтижесінде Қазақстан боксшылары толық басымдық танытып, 10 алтын және 2 күміс медаль жеңіп алды.

Өзбекстан жалпы есепте жетінші орынға ғана тұрақтап, 1 күміс және 2 қола медальмен шектелді.

Жалғыз Қазақстан — Өзбекстан финалында 48 келіге дейінгі салмақта Тілеуберді Сүлеймени Бехруз Холдоровты жеңді.

2025 жыл: Таиландтағы даулы турнир

Asian Boxing өткізген U-23 турнирі 2025 жылдың тамызында Таиландта өтті. Бұл жарыс төрешілік дауларымен есте қалды.

Ең көп талқыланған жекпе-жектердің бірі Аман Қонысбек пен Шавкатжон Болтаев арасындағы айқас болды. Өзбек боксшысы жеңімпаз атанғанымен, төрешілер шешімі көп сұрақ туғызды.

Жалпы есепте Өзбекстан 6 алтын, 3 күміс және 1 қола медальмен бірінші орын алды. Қазақстан құрамасы 3 алтын және 2 күміс медальмен екінші болды.

Дегенмен финалдағы жеке текетірестерде Қазақстан боксшылары 3:2 есебімен алда болды:

• Нұрислам Қалдыбаев Шохрух Абдумаликовты жеңді;
• Илья Калинин Саят Ильясовқа есе жіберді;
• Нұрбек Мұрсал даулы шешіммен Мухамадазизбек Исмоиловтан жеңілді;
• Санжарали Бегалиев камбэк жасап, Рахматулло Бойматовты ұтты;
• Темірлан Мұқатаев Шахзод Полвоновтан басым түсті.

2026 жыл: Джакартадағы жаңа текетірес

Биылғы Азия чемпионаты Индонезия астанасы Джакартада өтеді. Қазақстанның U-23 құрамасын аға бапкер Мақсат Бахтыбазаров бастап барады.

Қазақстан құрамасының өтінімі:

• 50 кг — Нұрзат Оңғаров;
• 55 кг — Бексұлтан Боранбек;
• 60 кг — Нұрасыл Төлебек;
• 65 кг — Асылхан Қошербай;
• 70 кг — Нұрбек Мұрсал;
• 75 кг — Аман Қонысбек;
• 80 кг — Өнер Сейілхан;
• 85 кг — Темірлан Мұқатаев;
• 90 кг — Ибрагим Битаев;
• 90 келіден жоғары — Аслан Елдібайұлы.

Өзбекстан да мықты құрам әкеледі

Өзбекстан құрамасының өтінімі де өте салмақты көрінеді:

• 50 кг — Амирбек Исмоилов;
• 55 кг — Фариёзбек Дусматов;
• 60 кг — Абдурахмон Махмуджонов;
• 65 кг — Илхомжон Иргашев;
• 70 кг — Абдуллоҳ Мадаминов;
• 75 кг — Абдулазиз Абдулхамидов;
• 80 кг — Фазлиддин Эркинбоев;
• 85 кг — Норбек Абдуллаев;
• 90 кг — Самир Собиров;
• 90 келіден жоғары — Озодбек Алиев.

Соңғы жылдардағы статистика екі елдің U-23 деңгейіндегі бәсекесі өте тең екенін көрсетеді. Сондықтан Джакартадағы Азия чемпионаты екі ел арасындағы жаңа әрі маңызды текетіреске айналмақ. Турнир қорытындысы 16 шілдеде белгілі болады.