Назым Қызайбай Азиадамен ерте қоштасты
Қазақстан әйелдер құрамасының көшбасшысы Жапониядағы Азия ойындарынан шығып қалды.
Төрешілер қытайлық боксшыны жеңімпаз деп таныды
Назым Қызайбай алғашқы кездесуінде қытайлық Сюань Чжаомен қолғап түйістірді. Үш раундқа созылған тартысты жекпе-жектің қорытындысы бойынша төрешілер жеңісті Аспанасты елінің өкіліне берді.
Бөлінген шешіммен аяқталған кездесудің есебі – 4:1. Осылайша Сюань Чжао ширек финалға жолдама алса, қазақстандық боксшы Азия ойындарындағы өнерін алғашқы айналымнан кейін тоқтатты.
Қазақстан үшін күтпеген нәтиже
Назым Қызайбай Жапониядағы додада жүлдеге негізгі үміткерлердің бірі саналған. Ол – үш дүркін әлем чемпионы әрі 2024 жылғы Олимпиада ойындарының қола жүлдегері.
Тәжірибелі боксшының 1/8 финалда жарыстан шығып қалуы Қазақстан әйелдер құрамасы үшін күтпеген нәтиже болды.
Азиада-2026 аясындағы бокс турнирі 2 қазанға дейін жалғасады. Қазақстанның әйелдер құрамасы бес салмақ дәрежесінде өнер көрсетіп жатыр.