Махмұд Сабырхан Азия ойындарын екі нокдаунмен бастады

Қазақстандық боксшы Махмұд Сабырхан Жапонияда өтіп жатқан 2026 жылғы Азия ойындарындағы алғашқы жекпе-жегін сенімді жеңіспен аяқтады.

55 келіге дейінгі салмақ дәрежесінің 1/8 финалында ол Иран өкілі Мехди Каземимен кездесті.

Екі рет нокдаунға түсірді

Үш раунд қорытындысында төрешілер жеңісті Махмұд Сабырханға бірауыздан берді. Есеп – 5:0.

Қазақстандық боксшы екінші және үшінші раундтарда қарсыласын тұрып саналатын нокдаунға түсірді.

Осылайша, Сабырхан ширек финалға өтіп, Азия ойындарындағы медаль үшін күресін жалғастырады. Ал Мехди Каземи жарысты аяқтады.

Махмұд Сабырхан – екі дүркін әлем чемпионы

Махмұд Сабырхан бұған дейін екі рет әлем чемпионы атанған. Сондай-ақ ол 2026 жылғы Азия чемпионы.

Сондықтан қазақстандық боксшы Азия ойындарында жүлдеге үміткер спортшылардың бірі саналады.

Қазақстан құрамасы төрт боксшысынан айырылды

Ерлер құрамасы Азия ойындарына алты салмақ дәрежесінде қатысқан. Қазірге дейін **Оразбек Асылқұлов** (60 кг) пен Сабыржан Аққалықов (80 кг) 1/8 финалда жеңіліп, жарыстан шығып қалды.

Әйелдер құрамасында бес боксшы болған. Олардың арасынан Назым Қызайбай (54 кг) мен Виктория Графеева (60 кг) медаль үшін күресті тоқтатты.