Покатилов бастаған "Сабах" алғаш рет Чемпиондар лигасына жолдама алды

Драмалық кездесуде жеңіске жетті

25 тамызда Бакудегі Тофик Бахрамов атындағы Республика стадионында Чемпиондар лигасының плей-офф кезеңіндегі қарымта матч өтті. "Сабах" Израильдің "Хапоэль" командасын 5:2 есебімен жеңді.

Ойында қонақтар 10-минутта есеп ашса, бірінші таймның соңында Кристиан Нвачукву есепті теңестірді. Алайда 61-минутта Гай Мизрахи мүмкіндікті пайдаланып, "Хапоэльді" қайта алға шығарды.

74-минутта Умарали Рахмоналиев есепті 2:2-ге жеткізді. Негізгі уақыттың соңғы секундтарында "Сабах" таразы басын өз пайдасына аударды. 90+4 минутта Теллур Муталимов гол соғып, матчты қосымша уақытқа жіберді.

Қосымша уақытта жеңісті жұлып алды

Қосымша уақытта алаң иелері қарсыласын тізе бүктірді. Алдымен Патрик Мбина 101 минутта гол соқса, кейін Джой-Ланс Микелс 115 минутта ойынның нүктесін қойып, есепті 5:2 етті. Қазақстандық қақпашы Стас Покатилов кездесуде 120 минут бойы алаңда болып, "Сабахты" капитан ретінде бастап шықты.

Еске салсақ , командалардың арасындағы алғашқы ойын "Хапоэльдің" 2:1 есебіндегі жеңісімен аяқталған еді. Осылайша, "Сабах" екі матчтың қорытындысы бойынша жеңіске жетіп, өз тарихында алғаш рет Чемпиондар лигасының негізгі кезеңіне шықты. Ал "Хапоэль" Еуропа лигасының негізгі кезеңінде бақ сынайды.