Қазақстанның ең танымал волейболшылардың бірі Сәбина Алтынбекова Instagram арқылы жанкүйерлеріне болашақ жоспарлары туралы мәлімдеп, спорттық мансабын аяқтауға дайын екенін айтты.
Әлеуметтік желідегі сторисінде 28 жастағы спортшыға бір жанкүйері «мансабыңызды жалғастырасыз ба?» деген сауал қойды. Алтынбекованың жауабы қысқа да нұсқа болды:
«Ұзақ емес. Уақыты келгенде кету керек деп санаймын. Басқа бағытта дамып, жас, болашағы зор ұрпаққа жол беру қажет», – деп жазды ол.
Қазір Сәбина елордалық «Астана» клубының намысын қорғауда. Бұған дейін ол Индонезияның Yogya Falcons командасында, БАӘ-нің «Аль-Васл», Жапонияның GSS Sunbeams, Италияның «Волалто Казерта» және қазақстандық «Алматы» клубтарында ойнаған.
