WTA Рыбакинаға ерекше мақсат қойды

Әлемдік қауымдастық ресми сайтта Рыбакинаның соңғы маусымдағы жетістіктеріне тоқталып, қазақстандық теннисшінің алдында маңызды міндет тұрғанын атап өтті.

"Рейтингтің шыңына ұзақ жол жүріп жеткен Елена Рыбакина енді тағы бір титул үшін күресуге дайын. Ол Индиан-Уэллске қазіргі чемпион әрі әлемнің бірінші ракеткасы ретінде қатысады. Бір жыл бұрын ол Эр-Риядтағы турнирді бірде-бір рет жеңілмей аяқтады. Жартылай финалда Джессика Пегуланы үш сетте жеңіп, финалда Арина Соболенконы тартысты кездесуде ұтты. Содан бері Рыбакина сол жетістігін тұтас бір тамаша маусымға айналдырды.

Australian Open финалында тағы да Соболенконы жеңіп, Штутгарттағы топырақ жабыны кортында өткен турнирде чемпион атанды. Кейін US Open жарысында екі аптаға созылған күрделі бәсекеден өтті. Мұнда Чжэн Циньвэнь мен Коко Гауффты үш сетте жеңіп, финалда Соболенконы 6:4, 5:7, 6:2 есебімен ұтты. Осылайша, маусымдағы екінші "Үлкен дулыға" турнирінің титулын иеленді. Бұл жеңістің нәтижесінде әлемдік рейтингте бірінші орынға көтерілді.

14 қыркүйекте 27 жас 89 күнде WTA рейтингінің көшін ресми түрде бастаған Рыбакина тарихтағы рейтингтің бірінші сатысына алғаш рет ең ересек жаста көтерілген екінші теннисші атанды. Бұл көрсеткіш бойынша одан тек Анжелика Кербер ғана үлкен.

Калифорниядағы турнирге Рыбакина маусымдағы 54 жеңісі, 14 жеңілісі және төрт титулымен келеді. Енді ол 2012–2014 жылдары қатарынан үш рет WTA қорытынды турнирінде жеңіске жеткен Серена Уильямстен кейін чемпиондық атағын қорғаған алғашқы теннисші атануға тырысады", – деп WTA сайты арнайы материал жариялады.

Елена Рыбакина WTA-2026 қорытынды турниріндегі алғашқы кездесуін чехиялық теннисші Линда Носковамен өткізеді.

Қорытынды турнирдің жүлде қоры жарияланды

Турнирдің жалпы жүлде қоры 10 миллион доллар, жекелей сын жеңімпазы 8 миллион, жұптық сын бойынша үздіктер 2 миллион доллар иеленеді. Жекелей сында барлық бес кездесуде жеңіске жеткен чемпион 3,3 миллион доллар сыйақы алады. Сонымен қатар чемпион 1500 рейтингтік ұпайға ие болады.

Өткен жылы Елена Рыбакина Эр-Риядтағы турнирді бірде-бір рет жеңілмей аяқтап, 5,2 миллион доллар иеленген еді. WTA қорытынды турнирі 8-15 қараша аралығында Индиан-Уэллсте өтеді.