"Шымбергеновтың жағдайын ұмытпайық": бапкер Төрехан Сабырханға ескерту жасады
Бокстан қазақстандық бапкер Мирамғали Ақмолдинов Төрехан Сабырханның өзбекстандық кәсіпқой Шохжахон Эргашевпен жұдырықтасуына қатысты пікір білдірді.
Эргашев неліктен фаворит?
2026 жылғы Азия ойындарының чемпионы Төрехан Сабырхан (1-0, 1 КО) мен Шохжахон Эргашевтың (27-2, 24 КО) ықтимал кездесуі IBA Nomad аясында талқыланып жатыр.
Ақмолдиновтің пікірінше, қазақстандықтың таланты мен әуесқой рингтегі жетістіктері тәжірибелі кәсіпқойды жеңуге кепіл бола алмайды. Бапкер Эргашевтың әлем чемпионы атағына таласқанын және мықты қарсыластармен жұдырықтасқанын алға тартты.
"Төреханның ерекше талант екенін түсінемін. Бірақ Эргашев те осал қарсылас емес. Ол чемпиондық белбеу үшін айқасқан, жақсы боксшыларды жеңген. Кәсіпқой бокста талай нәрсені көрген. Сондықтан кездесу кәсіпқой бокс ережесімен өтсе, мен Эргашевке басымдық беремін", — деді маман.
Шымбергеновтың нокауты еске алынды
Ақмолдинов Асланбек Шымбергеновтың тәжірибелі мексикалық кәсіпқойдан нокаутпен жеңілген жекпе-жегін мысалға келтірді. Оның айтуынша, сол кездесудің алдында да көпшілік қазақстандық боксшының жеңісіне сенген.
Маман әуесқой бокс өкілін кәсіпқой рингтің қыр-сырын меңгерген қарсыласқа шығаруды бапкерлер штабының үлкен қателігі деп бағалады.
"Бәріміз Шымбергенов оны жеңеді деп ойладық. Бірақ сол кеште ол нокаутқа түсті. Әуесқой боксшыны кәсіпқой бокста талай сыннан өткен қарсыласқа шығару үлкен қателік болды", — деді Ақмолдинов.
Төреханға қандай кеңес берілді?
Бапкер Сабырханға әзірге өз бағытын сақтап, басты назарын Олимпиадаға дайындыққа аударуға кеңес берді. Оның пікірінше, кәсіпқой боксқа немесе жұдырықтасудың өзге форматтарына асығудың қажеті жоқ.
"Төреханға Олимпиадаға біртіндеп дайындала беру керек деп есептеймін. Кәсіпқой боксқа, жалаң жұдырық жекпе-жегіне ұмтылмай, өзіне жақын бағытпен жүргені дұрыс", — деді бапкер.
Эргашевтың шақыруына екі қазақстандық жауап берді
Бұған дейін Ташкенттегі IBA Nomad 16 турнирінде сәтті өнер көрсеткен Шохжахон Эргашев келесі жекпе-жегін желтоқсанның басында Алматыда өткізгісі келетінін айтқан. Өзбекстандық боксшы Қазақстанның кез келген өкілімен кездесуге дайын екенін мәлімдеген.
Осыдан кейін Сабырхан лиганың әлеуметтік желісінде:" Шоу керек пе? Мен дайынмын", — деп жауап берді.
Эргашевты жекпе-жекке шақырғандар қатарында Олимпиада чемпионы Данияр Елеусінов те бар.