Күзде сергек жүрудің құпиясы: мамандар ұсынатын 3 әдет
Күннің қысқаруы, ауа райының салқындауы және күн сәулесінің азаюы күзде көңіл күй мен күнделікті белсенділікке әсер етуі мүмкін. Мұндай кезде үйде қалып, тәтті тағам жеп, қозғалысты азайтқың келеді.
Алайда дұрыс тамақтану, жеткілікті ұйқы және қалыпты физикалық белсенділік күзгі кезеңді сергек өткізуге көмектеседі. Күзде ағзаға қажетті дәрумендер мен минералдарды теңгерімді тамақтану арқылы алған дұрыс. Рационда көкөніс, жеміс-жидек, балық, ет, жұмыртқа, жаңғақ және тұтас дәнді өнімдер болғаны жөн.
Мысалы, С дәруменіне цитрус жемістері, киви және қырыққабат бай. Е дәруменін жаңғақтар мен өсімдік майларынан, ал магний мен мырышты жаңғақ, тұқым, ет және теңіз өнімдерінен алуға болады.
Күзгі мәзірге асқабақ, құрма және жүзімді де қосуға болады. Асқабақ бета-каротинге бай, ал жемістер ағзаға дәрумендер мен тағамдық талшық береді. Дегенмен құрма мен жүзімнің құрамында табиғи қант көп болғандықтан, оларды шамадан тыс тұтынбаған дұрыс.
Қозғалысты азайтпау
Салқын ауа райы сыртқа шығуға деген ынтаны төмендетуі мүмкін. Бірақ күнделікті қозғалыстан толық бас тарту ағзаға пайдалы емес. Міндетті түрде ауыр жаттығу жасаудың қажеті жоқ.
Жаяу жүру, жеңіл жаттығулар, үй жағдайындағы қысқа жаттығулардың өзі күнделікті белсенділікті сақтауға көмектеседі. Егер бұған дейін спортпен тұрақты айналысып жүрсеңіз, жаттығу режимін жалғастыруға болады. Ал спортқа енді кіріскендер жүктемені біртіндеп арттырғаны дұрыс.
Көмірсудан толық бас тартпаңыз
Көмірсулар – ағза үшін маңызды энергия көздерінің бірі. Сондықтан салмақты бақылау мақсатында оларды рационнан толығымен алып тастау міндетті емес.
Мәзірде сұлы, қарақұмық, күріш, тұтас дәнді нан және макарон өнімдері сияқты күрделі көмірсулар болғаны дұрыс. Көкөністер мен жемістер де көмірсулардың көзі. Ал тәттілер мен қант мөлшері жоғары өнімдерді күнделікті әдетке айналдырмаған жөн.
Күзде ыстық шай немесе кофе ішіп отырып, тәтті тағамға әуестену оңай. Бірақ күн сайын печенье, шоколад немесе бәліш жеу рациондағы артық калория мөлшерін көбейтуі мүмкін.
Оның орнына қант қоспай ішетін жеміс шайларын, жылы суды таңдауға болады. Ал тәтті жегіңіз келсе, жидектер, табиғи йогурт немесе аз мөлшердегі жаңғақпен үйлестіруге болады.
Демалыс аса маңызды
Күзгі шаршаудың себептерінің бірі дұрыс демалмау болуы мүмкін. Ересек адамға әдетте тәулігіне 7-9 сағат ұйқы қажет. Ұйқы режимін тұрақтандыру үшін күн сайын шамамен бір уақытта жатып, бір уақытта тұрған жөн.
Күз – белсенділіктен толық бас тартатын кезең емес. Керісінше, ұйқыны реттеп, теңгерімді тамақтанып, күнделікті қозғалысты сақтап, демалысқа уақыт бөлу арқылы осы маусымды әлдеқайда жайлы өткізуге болады.