Покатилов "Сабахқа" Чемпиондар лигасында тарихи жеңіс әкелді
Қазақстан құрамасының қақпашысы Стас Покатилов өнер көрсететін әзербайжандық "Сабах" Чемпиондар лигасының жалпы кезеңінде алғаш рет жеңіске жетті.
Покатилов капитан ретінде алаңға шықты
Бакудегі Олимпиада стадионында өткен кездесуде қазақстандық қақпашы "Сабахтың" негізгі құрамында ойнап, команданы капитандық таңғышпен бастап шықты.
Покатилов матчты толық өткізіп, қақпаға бағытталған алты соққыны қайтарды. Оның сенімді ойыны алаң иелерінің қақпасын голдан аман сақтап, тарихи жеңіске қол жеткізуіне көмектесті.
"Сабахта" кімдер гол соқты?
Ойынның алғашқы голы 49-минутта тіркелді. Иван Лепиницаның пасынан кейін Кахим Пэррис "Славия" қақпасынан саңылау тапты. Ал 88-минутта Джой-Ланс Миккельс басымдықты еселеп, матчтың қорытынды есебін белгіледі.
Осылайша "Сабах" клуб тарихында тұңғыш рет Чемпиондар лигасының жалпы кезеңінде жеңіске жетті.
Әзербайжандық команда алғашқы турда "Манчестер Юнайтедке" 0:4 есебімен есе жіберген. Бакулықтар турнирдегі келесі кездесуін 20 қазанда өткізеді. Бұл жолы Покатиловтың командасы дортмундтық "Боруссиямен" ойнайды.