Бибісара Асаубаеваның жеңісі ірі шахмат сенсацияларының бірі ретінде аталды
Жуырда қазақстандық шахматшы Будапештте өтіп жатқан Total Chess World Championship Tour Pilot турнирінде Арджун Эригайсиді жеңген болатын.
Үндістанның The New Indian Express басылымы қазақстандық шахматшы Бибісара Асаубаеваның Будапештте өтіп жатқан Total Chess World Championship Tour Pilot турнирінде Арджун Эригайсиді жеңуін жоғары бағалады.
Басылым авторы бұл нәтижені классикалық рейтингке есептелетін партиялардағы соңғы жылдардың ең ірі сенсацияларының бірі деп атаған.
Рейтинг айырмасы шамамен 200 ұпай болған
Материал авторының жазуынша, Эригайси рейтингте Асаубаевадан шамамен 200 ұпайға жоғары тұрған.
Үндістандық гроссмейстер ақ тастармен ойнап, дебюттен кейін қолайлы позицияға ие болған және шағын басымдығын ұзақ уақыт пайдалануға тырысқан. Алайда басылымның бағалауынша, Эригайси позицияны тым күштеп ойнауға әрекет жасап, соның салдарынан құрылымдық әлсіздіктерге жол берді.
The New Indian Express қазақстандық шахматшы шешуші сәтте өте дәл ойнағанын атап өтті.
"Блицтегі шеберлігімен танымал қазақстандық шахматшы бар назарын жинап, мінсіз жүрістер сериясымен шешуші басымдықты жүзеге асырды. Нәтижесінде мат қаупі күшейіп, үндістандық шахматшы берілуге мәжбүр болды", – делінген материалда.
Басылым тағы бір қызықты жайтқа назар аударды.
Шешуші сәтте бірден төрт камера Асаубаева мен Эригайсидің партиясын түсірген. Бұл уақытта сол залда әлемдік шахматтың басты жұлдыздарының бірі Магнус Карлсен де ойнап жатқан.
Соған қарамастан, турнирдегі басты назардың бірі қазақстандық шахматшының партиясына ауған.