Дулат Бекбауовтың Мексикадағы жекпе-жегі жарияланды
Дулат Бекбауовтың бұған дейінгі жекпе-жегі 25 шілдеде Алматыда өткен болатын.
Жартылай орта салмақта жұдырықтасатын қазақстандық боксшы Дулат Бекбауов (4-0, 3 КО) кәсіпқой рингтегі келесі кездесуін Мексикада өткізеді.
Baja Boxing промоутерлік компаниясы қазақстандық боксшының 31 қазанда Тихуана қаласында өтетін бокс кешіне қатысатынын жариялады.
Қарсыласы – Хуан Рамон Гусман
Дулат Бекбауов жергілікті боксшы Хуан Рамон Гусманмен (18-12-1, 14 КО) жұдырықтасады.
Мексикалық спортшының кәсіпқой рингте тәжірибесі мол болғанымен, қазір сәтсіз серияда келеді. Гусман соңғы тоғыз жекпе-жегінде қатарынан жеңілген.
Хуан Рамон Гусман соңғы рет 9 мамырда рингке шығып, отандасы Антонио Вальдовиньосқа (11-1-2, 7 КО) техникалық нокаутпен есе жіберді.
Бекбауов соңғы кездесуін Алматыда өткізді
Дулат Бекбауовтың бұған дейінгі жекпе-жегі 25 шілдеде Алматыда өтті.
Қазақстандық боксшы Беларусь өкілі Евгений Долголевецті (8-3, 4 КО) төрешілердің бірауыздан шығарған шешімімен жеңді.
Осылайша, Бекбауов кәсіпқой бокстағы жеңіліссіз сериясын Мексикада жалғастыруға тырысады.