Самородов пен Кенжебекті жаңа бапкер жаттықтыруы мүмкін
Бұған дейін БАҚ-та "Ахматтың" қазіргі бас бапкері Станислав Черчесовтың қызметінен кететіні туралы ақпарат тараған болатын.
Грозныйдың "Ахмат" клубына ресейлік маман Ролан Гусев бас бапкер болып келмек.
"РБ-Спорт" мәліметінше, Гусев Воронеждің "Факел" клубын басқару нұсқасынан бас тартып, мансабын Грозныйда жалғастыруды жөн көрген.
Бұған дейін БАҚ-та "Ахматтың" қазіргі бас бапкері Станислав Черчесовтың қызметінен кететіні туралы ақпарат тараған болатын. Бұл мәлімет Ресей Премьер-лигасының 13-туры аясында грозныйлық клубтың Мәскеудің "Динамосынан" сырт алаңда 0:2 есебімен жеңілгенінен кейін шықты.
"Ахматта" екі қазақстандық футболшы ойнайды
"Ахмат" сапында Қазақстан құрамасының шабуылшылары Максим Самородов пен Ғалымжан Кенжебек өнер көрсетеді.
"Динамоға" қарсы кездесуді Самородов негізгі құрамда бастап, 76-минутта алмастырылды.
Ал Ғалымжан Кенжебек матч өтініміне енген жоқ.
Команда қауіпті аймақта тұр
Ресей чемпионатындағы 13 матчтан кейін "Ахматтың" еншісінде 11 ұпай бар.
Грозныйлық клуб турнир кестесінде Премьер-лигадан түсіп қалу аймағында орналасқан.
Келесі матчта "Ахмат" 7 қарашада "Родинамен" кездеседі. Ойын Қазақстан уақытымен 18:30-да басталады.