Мамандар күнделікті жаттығудың қаупін түсіндірді
Фитнес пен жүгіруді ұнататындар үшін күн сайын жаттығу жасау тәртіп пен табандылықтың белгісі саналады.
Алайда тұрақты физикалық белсенділік пен ағзаны шамадан тыс шаршатудың арасында үлкен айырмашылық бар. Фитнес-жаттықтырушы күнделікті жаттығудың қай кезде пайдалы немесе зиян екенін түсіндірді.
Күнделікті жаттығу жасау ағзаға зиян ба?
Күн сайын жаттығуға болады, бірақ бұл әр күні бірдей қарқынмен және дәл осы бұлшықет топтарына күш түсіру керек деген сөз емес. Ағзаға физикалық жүктемеден кейін қалпына келуге уақыт қажет.
Мамандардың айтуынша, бұлшықеттердің жаттығудан кейін қалпына келуіне 24-72 сағат қажет болуы мүмкін. Ал сіңірлер мен байламдар қанмен баяу қамтамасыз етілетіндіктен, ұзағырақ уақытты қажет етеді.
Сондықтан бір бұлшықет тобына қатарынан екі күн ауыр күш түсіру ұсынылмайды. Жаттығудан нәтиже алу үшін физикалық жүктеменің қарқындылығын дұрыс бөлу маңызды. Ауыр жаттығулардан кейін ағзаға жеңіл қозғалыс пен демалысқа уақыт берген жөн.
Ағзаға демалыс қажет екенін қалай білуге болады?
Шамадан тыс жүктеме кезінде ағза бірнеше белгі беруі мүмкін. Олардың қатарында:
- жүгіру қарқынының төмендеуі;
- бұлшықеттердің үнемі сырқырап, ауырсынуы;
- ұйқы бұзылуы;
- таңертеңгі тыныш қалыптағы жүрек соғысының әдеттегі көрсеткіштен минутына 5-10 рет жоғары болуы;
Егер бұған ашушаңдық немесе жаттығуға деген қызығушылықтың жоғалуы қосылса, бұл шамадан тыс шаршаудың белгісі болуы мүмкін. Мұндай жағдайда жаттығу көлемін 40-50 пайызға азайту немесе бірнеше күн үзіліс жасау ұсынылады.
Күн сайын қозғалыс пен қарқынды жаттығу жасау екі бөлек нәрсе. Спорттағы тұрақты нәтиже тек жүктемеге емес, ағзаның дұрыс қалпына келуіне де байланысты.